අද සමාජේ ඉන්න බොහෝ දෙනා තමන් කියන දේ කරන, කරන දේ කියන අය නෙවෙයි. ඔවුන් සවන්දෙන්න, කියවන්න, නරඹන්න යොමුවන නිර්මාණ ගැන උනත් හරියටම අදහසක් ගන්න අමාරු ඒ හින්දමයි.
රසාස්වාදය කියනදේ පුද්ගලයාගෙන් පුද්ගලයාට වෙනස් වෙනවා. ඒක එහෙම වෙන්නෙ මිනිස්සු හැදෙන වැඩෙන සමාජයත් එක්ක. ඒ සමාජෙ ඇසුරු කරන අය, ඇහෙට දකින දේවල් මේ හැමදේම එක්කම එන ආකල්ප‍ය එක්ක. කෙනෙක් තමන්ගෙ මනසෙ මට්ටම අනුව නිර්මාණයක් වෙත යොමුවීම, තවකෙක්ට විහිලුවක් විය යුතු නැහැ.
මිනිස්සු වැඩිපුරම බය සමාජෙ තමන්ට හිනාවෙනවට. ඒ හින්දම මිනිස්සු බයයි තමන්ගෙ මතය ලෝකෙට ඉදිරිපත් කරන්න.
මිනිස්සු වෙනුවෙන් කෙරුණු නිර්මාණ පැති දෙකක් ඔස්සෙ අපිට ගන්න පුලුවන්.

1. අති උසස් රසාස්වාදයක් සහිත සාහිත්‍යමය වටිනාකමක්ද ඇතිව මිනිස්සුන්ගෙ යටි හිතට කාවැදෙන නිර්මාණ සහ
2. මිනිසුන්ගෙ උඩුහිත අවුස්සන,ආසාවෙන් පුරවන, හීන ලෝකෙක අතරමං කරන නිර්මාණ

මේ කියන්න යන්නෙ දෙවැනි ගණයේ ෆැන්ටසි නිර්මාණ ගැන.
හුඟක් අය මෙන්න මේ ෆැන්ටසි නිර්මාණ ගැන කතාකරන්නෙ ” මේවා බලන, කියවන අයත් ඉන්නවද අනේ.. ” කියන මවාපාන අප්‍රසාදයකින්. මෙහෙම නිර්මාණයක් බලන කෙනෙක් ඉන්නවා කියන්නෙ අතේ ඇඟිලි ගානටත් අඩුවෙන්. එහෙම හිටියත් ඒ අයට සමාජෙන් එල්ලවෙන්නෙ උපහාසාත්මක සිනහවක්..
හැබැයි මෙතන තියන ලොකුම ගැටළුව, හැමෝම බනිද්දි, සමාජ ජාලාවල විහිලුවක් වෙද්දි, කොහොමද මේ නිර්මාණ පිට පිට වසර ගණනක් ජනප්‍රිය නිර්මාණය වෙන්නෙ ? කොහොමද ආදායම් වාර්තා බිඳහෙලන්නෙ ? කොහොමද මේ නිර්මාණකරුවන් යුගයේ ජනප්‍රිය ලේඛකයන්, නිර්මාණකරුවන් වෙන්නෙ ?

ඇත්තටම ඒක එහෙම වෙන්නෙ මිනිස්සු මේ කිසිදෙයක් නොබලා ඉද්දි පිටසකවලින් ඇවිත් අය මේ නිර්මාණ බලලද ? නැහැ. මිනිස්සු අහේතුක ලැජ්ජාවක් හදාගෙන මේ නිර්මාණ කාණ්ඩය ගැන.
අපි කතාකරමු ඒ ගැන…

මොකද්ද මේ ෆැන්ටසිය කියන්නෙ ? ඇයි මිනිස්සු ෆැන්ටසියට ඇබ්බැහි වෙන්නෙ ?
වරදවා තේරුම්ගන්න එපා.. ෆැන්ටසිය කියන්නෙ සුඛෝපභෝගී ජීවිතයට නෙවෙයි. ෆැන්ටසිය ඇතුලෙ වෙන්නෙ මිනිස්සු ඔවුන්ගෙම හිතට සැන්සීමක් දැනෙන දෙයක් හොයාගන්න එක. නිදහස් හැඟීමක් හොයාගන්න එක.
ඒ ෆැන්ටසිය තියෙන්නෙ හද්ද පිටිසර ගමක ලිඳකින් හීතල වතුර ටිකක් නාගනිද්දි වෙන්න පුලුවන්.
එහෙම නැත්නම් තට්ටු පහක ගෙදරක හොට් වෝට(ර්) ශවර් එකකින් නාගනිද්දි වෙන්න පුලුවන්. කෙනාගෙන් කෙනාට ඒ ආසාවල් වෙනස් වෙන්න පුලුවන්. මිනිස්සු මේ සමාජෙ එක හැල්මෙ දුවලා දුවලා හෙම්බත් වෙද්දි හුඟක් අවස්ථාවල මනස වෙහෙසෙන දේකට වඩා මෙහෙම හීන ලෝකෙක, ෆැන්ටසියට ටිකක් ඉදලා එන්න ආසයි. ඉතින් මිනිස්සු ඉබේටම ඇබ්බැහි වෙනවා.වෙනරටක නිර්මාණයකට උනත් හිත යන්නෙ ” මෙහෙ මෙහෙම අය නෑනෙ, මෙහේ මෙහෙම තැන් නෑනෙ.. ” කියලා හිතෙන සිතුවිල්ලත් එක්ක.

අපිට බැහැ කෙනෙක්ගෙ නිර්මාණයක උස් පහත් බව කියන්න. මිනිස්සුන්ගෙ හදවත් වල නැවතෙන නිර්මාණ කරන්නත් හැමෝටම බැහැ. ඔබට කියන්න තියෙන්නෙ මෙපමණයි.
හැම නිර්මාණයම රසවිඳින්න. ජීවිතේට ගන්න තියෙන දෙයක් ගන්න. ජනප්‍රිය සහ හොඳම කියන්නෙ දෙකක්..

මේ සමාජේ ඔබට රහ දේ ඔබ විඳින්න !

– නිශාරා සමාධි

LEAVE A REPLY

Please enter your comment!
Please enter your name here